မည်သည့်လ၌ မဆို (၃) ရက်၊ (၁၂) ရက်၊ (၂၁) ရက် (၃၀) ရက် ဖွားမြင်သော သူများ

 

(၃) ဂဏန်းပိုင်ရှင်များသည် တိုက်ခိုက်ခြင်း၊ စစ်မက် အဓိပ္ပါယ်ကို ဆောင်၏။ ၎င်းတို့ဘ၀မှာ လက်ဝှေ့သမားကဲ့သို့ပင်ဖြစ်၏။ တစ်ဖက်သားကို အစဉ်အနိုင်ယူနေရမည်ဖြစ်ပြီး မိမိက အနိုင်မယူသည့်နေရက်၌ မိမိအရှုံးပေးရမည်ဖြစ်၏။ တိုက်ခိုက်နေရခြင်းဖြင့်လည်း အစဉ် ထင်ရှား၏။ ၎င်းတို့အား ဖိနှိပ်သည့် အကြောင်းအရာပေါ်လာလျှင် ထိုအကြောင်းအရာကို တော်လှန်သဖြင့် အောင်မြင်တတ်လေသည်။

 

(၃) သမားများသည် သူတပါးကို ညွန်ပြနိုင်ခြင်း၊ အမိန့် သြဇာပေးနိုင်ခြင်းစသည့် အာနိသင်များကို ပိုင်ဆိုင်တတ်လေ၏။ ထို့ကြောင့် စစ်ဘက်ဆိုင်ရာ အုပ်ချုပ်ရေးတွင် လုပ်ကိုင်သင့်၏။ သမ္မတနေရာတွင် ရယူနိုင်လျှင် ပိုကောင်း၏။ ၎င်းတို့က အမိန့်ပေးတတ်သလောက် ကိုယ်တိုင်ကလည်း စည်းကမ်းကြီးခြင်း၊ ဥပဒေကို ရိုသေလိုက်နာ ခြင်းရှိတတ်လေသည်။ ၎င်းတို့သည် ကြီးမားသော ရာထူးဌာနန္တရတွင် နေရာ ရတတ်ပြီး လက်အောက်ငယ်သား များစွာကို အုပ်ချုပ်ရတတ်၏။

 

အပြောထက် အလုပ်ကို လုပ်ပြတတ်၏။ မည်သည့်ဘ၀တွင်မဆို မည်သည့်နေရာ ရောက်ရောက် ထိပ်ဆုံးကနေသာ နေရတတ်၏။ အချို့ကမူ ရုပ်ပိုင်းဆန်လွန်းပြီး သည်းခံနိုင်စွမ်းနည်းခြင်း၊ ရန်လိုနေခြင်း၊ ဒေါသကြီးခြင်းများကြောင့် ထောင်အချုပ်နှင့် ဘ၀ကို နှစ်ပါးသွားနေရတတ်၏။ အချို့ကမူ စိတ်နှစ်ခွဖြစ်လျှက် မပြတ်မသားနှင့် မရေမရာနှင့် ပျင်းရိခြင်း၊ ဆုံးခန်းတိုင်အောင် မလုပ်ခြင်း အလုပ်မလုပ်မီ နောက်ဆုတ်တတ်ခြင်းတို့ကြောင့် နာမည်ပျက်ရတတ်၏။

 

စိတ်နှစ်ခွဖြစ်နေတတ်သောကြောင့် ပညာရပ်နှစ်မျိုးကို လိုက်စားတတ်၏။ လိုက်စားသည့် ပညာရပ်ကိုလည်း နှစ်မျိုးစလုံး တော်တတ်နိုင်စွမ်း၏။ တစ်မျိုးနှင့် တစ်မျိုး ဆက်စပ်မှု နည်းသော်လည်း လေ့လာနိုင်စွမ်းကြောင့် လိုက်စားသည့် ပညာရပ်တိုင်း အများထက် နှာတစ်ဖျားသာနေလေ့ရှိ၏။ သိပ္ပံပညာရပ်ဆိုင်ရာ၊ တွေးခေါ်မှုပိုင်းဆိုင်ရာ၊ အနုပညာ၊ အဘိဓမ္မာပညာရပ် ဘာသာရေးစသည့်နေရာတို့တွင် ကျွမ်းကျင်လိမ္မာလေ့ရှိတတ်၏။ လိုက်စားမှုမှာလည်း တမူထူးကာ လိုက်စားနိုင်၏။

 

(၃) ဂဏန်းသမားများသည် စိတ်မြန်လက်မြန်ရှိတတ်၏။ စိတ်က ဆုံးဖြတ်ချက်ချလျှင် ကိုယ်က ချက်ချင်းရောက်နေတတ်၏။ ခေါင်းထဲက ပေါ်လာသော အကြံဉာဏ်ကို ချက်ချင်း အကောင် အထည်ဖောတတ်၏။ စိတ်မြန်လက်မြန်ရှိသလို အပြောင်းအလဲလည်း မြန်တတ်၏။ ၎င်းတို့ကို ကြည့်၍ မည်ကဲ့သို့လူစားပေပဲဟု ဆုံးဖြတ်ချက်ချရခက်၏။ စိတ်ကူး စိတ်သန်းမြန်သလို အခုတမျိုး ချက်ချင်းတစ်မျိုးလုပ်တတ်သူဖြစ်သည်။

 

အမှားပြုမိလျှင် လူရှေ့သူရှေ့ ၀န်ခံရန် သိပ်ခက်တတ်ပြီး သူ့ဘာသာ သူနောင်တရနေတတ်၏။ ၎င်းတို့အား ယုံကြည်သူအပေါ်တွင် ထာဝရသစ္စာရှိနေတတ်၏။ ၎င်းတို့အတွက် မည်သည့် အလုပ်ကို မလုပ်ဟူသော စိတ်မျိုးမရှိချေ။

 

ကိုယ်ချင်းစာတရား လက်ကိုင်ထားတတ်သော်လည်း တပြိုင်နက်ပင် ရန်မူတတ်၏။ ရန်သူဟူသမျှကို တိုက်ခိုက်ရန်သာ အားသန်၏။ (၃) ဂဏန်းသမားများ၏ ဘ၀တစ်လျှောက်လုံး ရန်သူများဖြင့် ပြည့်နေတတ်၏။

 

သင့်တော်သော အဆောင်မှာ ဂေါ်မုတ်ကျောက်ကို လက်စွပ်လုပ်ဝတ်ခြင်းဖြစ်၏။ ခရမ်းရောင်၊ မရမ်းရောင်၊ အညိုရောင်၊ နှင်းဆီရောင်စသည့် ရောစပ်ထားသည့် အရောင်များနှင့် သင့်လျှော်၏။ စိတ်အားကို အသုံးချလွန်းခြင်းကြောင့်၎င်း၊ မအိပ်မနေ လုပ်တတ်ခြင်းကြောင့်၎င်း ကျန်းမာရေး ချို့ယွင်းတတ်သည်။ အဆုတ်အားနည်းတတ်၏။ လည်ချောင်းနှင့် နှာခေါင်းတွင် ရောဂါရတတ်၏။ စိတ်ကို မကြာခဏ အနားပေးသင့်သူဖြစ်သည်။